تجربتي مع inecto naturals coconut shampoo and oil .

هاي , شخباركم ؟

الشامبو ومين مايعاني برحلة البحث عن شامبو عدل يناسب نوعية شعرنا ..

انا شخصياٌ أكثر شي اعاني منه شعري ونوعيات الشامبو الي استخدمتها بما ان نوعية شعري جاف .. 

يااستخدم شامبو يجفف شعري او انه يدهن شعري , وانا شعري محتاج ترطيب بشكل معقول مو دهن !! 

فجربت اكثر من نوع : شامبو ايف روشيه ( بالشوفان ) , وجربت بانتين , وجربت سان سيلك 

بالنسبه لشامبو ايف روشيه مدح عليه كثيير بس م ناسبني ابدا .. وبانتين يجفف الشعر اكثر .. سان سيلك جميل بس حبيت اغيره ..

وبالصدفه وانا ببوتس لفت نظري هذا الشامبو والزيت حقه .. اخذتهم وقريت عنهم .. وجربتهم بعد 3 شهور حكمة عليهم 

 بالنسبه لشامبو .. يناسب الشعر الجاف والمجعد .. 

من مكوناته :أكوا، كبريتات لوريث الصوديوم، كلوريد الصوديوم، كوكاميد دي، البيتين كوكاميدو بروبيل، والغليسرين، ثنائي ستيريت جلايكول، ستيريث -4، ارغانيا سبينوسا (ارغان) نواة النفط، بولي كواتيمينيوم -10 ورائحة وكربونات الصوديوم، بنزوات الصوديوم، هيدروكسيد

"

"

"

يعطي الشعر تغذيه مكثفه لانه يحتوي على عناصر طبيعيه , يغذي الشعر الجاف بشكل مكثف ويعطي الشعر مظهر صحي 

يحتوي الشامبو على الغريسرين تعطي الشعر نعومه وسلاسه ..

الشامبو م يحتوي على رغوه , رغوته خفيفه جداُ وهذا اكثر شي مطمني . لان الرغوة تنشف الشعر وتضره ...

ينظف فروة الراس والشعر .. بس م تسخدمه وحده فروة راسها دهنيه لانه م راح ينظفها 

ينظف الدهون الطبيعيه .

"

"

بالنسبه لزيت , مااحسه معالج فقط يعطي ترطيب لشعر 

مثلا قبل الشور تحطينه بنصف ساعه خيار سريع 

خصوصاُ ان البكج عملي جداُ على شكل سبري بس مايوزع على الشعر على طول 

يعطي ترطيب ,

"

"

" 

اسعارهم جداٌ رخيصه , كمياتهم كبيره جداً 

موجود في صيدلية بوتس 

مجموعة كلينك .

سلام بنات !

بتكلم عن مجموعة العنايه بالبشره من كلينك , ورائيي فيها

كنت متردده جداً اني اشتريها ولما كنت اتصفح موقع نمشي حصلتها بسعر مناسب وحجمها جداً مناسب لتجربه

وهي عباره عن  5 منتجات وهي : غسول للبشره , وكريم مرطب للبشره , كريم مرطب لمنطقة تحت العين , تونر , مزيل مكياج

حطيت بوست بالانستقرام وتكلمت عنها بشكل عام وبتجربه خفيفه

والحين صار لي 4 اسابيع استخدمها وصار وقت اعطي رائيي فيها

اولا ً نبدا بالغسول : بالنسبه لي ممتاز جداً استخدمه مع جهاز تنظيف البشره ينظف البشره عدل ولطيف على البشره .
ثانياَ كريم ترطيب : ترطيبه جداً ممتاز بالنسبه لنوع بشرتي عاديه الى جافه , ناسبها كثير ورطبها عدل عدل .
ثالثاً كريم ترطيب لمنطقة حول العينين : مرطب لطيف وخفيف جداً تتمتصه البشره بسهوله .
رابعاً تونر : قوي جداً تحسين بلسعات على البشره مارتحت له ☹ صرت استخدمه لرقبتي .
خامساً مزيل المكياج : زيتي ماحبيته ابداُ فصرت استخدمه لازالة الحمر (الارواج) واثار الماسكرا .

 المجموعه كامله م راح ارد اشتريها فقط برجع اشتري الغسول وكريم ترطيب البشره , هم اكثر شي ناسبوني وارتحت لهم

اما الباقي لهم بدائل مريحين اكثر .

وايد اشكر البراندات الي يسون مجموعة تجربه مثل جي , عشان يعطونا راحتنا بالتجربه وهل ينفع اشتري سايز اكبر او لا .

والي بتقول يعطونج عينه مو كل مكان يعطيج عينه وحزات العينه حجمها ماكو اصغر منه , ماتعطيج الحريه بالحكم على المنتج


ونصيحه بنات اي براند يسوي مجموعه مثل جي جربوها بدون تردد اذا كان سعرها مناسب وحجمها مناسب وعدد المنتجات
الموجوده , لان مثل هالمجموعه لو اخذ الكريم بروحه حجمه 50 مل ب 100 ريال , نص سعر المجموعه والسايز كله 50 مل .



سعر المجموعه : 285 ريال .
موقع الشراء :
https://ar-sa.namshi.com/?utm_source=partnerweb&utm_campaign=566&utm_content=jam&utm_term=jam



والي جربتها تكتب رائيها .. وشكراً

العنايه وفق الفئات العمريه

الموضوع راح يكون غريب عند البعض والبعض الاخر مألوف

بعيدا عن الفلسفه وبعيدا عن تسويق المنتجات

الموضوع مهم جدا لان كل شخص مفروض يعرف فئته العمريه عشان يتعامل مع عنايته بشكل صح

الفئه العمريه عباره عن مرحله عمريه
مثال :

منذَ الولاده حتى 10 سنوات (فئه)
من 11-20 سنه (فئه)
من 21-30 سنه (فئه)
من 31- 40 سنه (فئه)
وهكذا

كل فئه لها شي اساسي لازم تمشي عليه لانه يتوافق مع احتياجات فئتها العمريه
فأنا راح اتكلم فقط عن شي اساسي م راح اتكلم عن الاشياء الثانويه

مثال واضح :
منذَ الولاده حتى 10 سنوات (هالعمر محتاج لترطيب فقط)
فشي اساسي على امه انها تستخدم له مرطب ترطب كامل جسمه بشكل يومي
او زيوت وغيره لترطيب لان بشرة الطفل منذَ الولاده تتقشر فمحتاجه ترطيب عميق ونلجاء طبعاً للمرطبات الطبيه

ومن 11سنه الى 20 سنه : في هذي الفئه البشره تتغير من مرحلة الطفوله الى المراهقه فالبعض يلاحظ البشره تدهن اكثر والبعض الحبوب تضايقه
وتتغير البشره بشكل واضح من النعومه والصفاء في الطفوله الى بشره ثانيه تماما
مليئه حبوب شباب ومشاكل في البشره فالافضل لنفسك ولبشرتك الجوء لطبيب جلديه
عشان ينصحك منتجات تلائم بشرتك
من ناحيتي انا الحمدلله يارب ماعانية ابدا من الحبوب وغيره بشرتي كلش ماتغيرت
بس كنت ارطبها واهتم بتنظيفها لان المسامات بتتوسع اكثر والروؤس السوداء
وطبعاَ استخدم غسول ملائم لفئتي العمريه ونوع بشرتي

ومن 21 الى 30 سنه : هذا السن يكون الاهتمام دقيق جدا لتفادي ظهور الخطوط الرفيعه
وراح يلجاء هذا العمر لبراندات كبيره ولمنتجات ملائمه جدا لنوع البشره والفئه العمريه

ومن 31 سنه الى 40 سنه :بيكون الخوف يكبر من التجاعيد البعض يمكن يلجاء لعيادات تجميل والبعض الاخر
يلجاء لمستحضرات التجميل المحاربه لتجاعيد

وكل مانكبر بفئتنا العمريه تكبر احتياجاتنا اكثر واكثر

بس اهم شي تفهمين شنو تحتاجين بهذي الفئه يعني مو معقوله عمرج 15 سنه تستخدمين
منتجات محاربه لعلامات تقدم العمر

شوي تركيز وفهم لنوع بشرتج وتكون عنايتج تمام التمام

الموضوع حبيت اطرحه بعيداَ عن الفلسفه وعن مدح براندات
ان شاء الله استفدتو من الموضوع ولو بشي القليل .

كيف تعرفين نوع بشرتك ..؟ وطريقة العنايه بها ,

كيف تعرفين نوع بشرتك ؟

كثيير توصلني اسئله يسألوني كيف اعرف نوع بشرتي او ,شنو استخدم لبشرتي ؟ شنو يناسب بشرتي

وطبعاَ قبل لاتشترين اي منتج وتقطين عليه فلوس , تعرفين اذا يناسب بشرتك او لا ,

لان ممكن تقطين فلوسج على منتج بنهايه تنصدمين انه حسس بشرتج او جففها زياده او طلع لج حبوب 

(وهذول كلهم صارولي من قبل , والسبب جهلي في نوع بشرتي ( طبعاصارو لي في فترة المراهقه

وطبعا ممكن تتحسس او تتهيج من منتجات طبيعيه مثال اقنعة البشره الي تسوينها في البيت .

فعشان كذا قررت اني انزل هالموضوع تفادياَ لمثل هذي الاسئله 

انواع البشره : حساسه , عاديه , جافه , دهنيه , مختلطه 

وبتكلم عن كل وحده بشكل مفصل وكيف تعرفين نوع بشرتك 

اولاَ راح نسوي اختبار لبشرتك : غسلي بشرتك بماي فقط , جففيها عدل واقعدي من ربع ساعه الى نصف ساعه 

لاتحطين شي عليها , بعدها المسيها (طريقة المس بتكون مسح سطح البشره بالضغط )

وشوفي ملمس البشره وشكلها وشنو تلاحظين عليه ؟

اذا حسيتي انها شاده وملمسها مافيه جفاف ولا دهون (عاديه)

واذا حسيتي بوجود طبقه دهنيه (دهنيه)

اما اذا حسيتي انها عاديه بس منطقة الانف والجبهه ملمسها دهني (مختلطه)

واذا كان عاديه بس تلاحظين انها تتحس من بعض المنتجات سواءَ طبيعيه او كيميائيه (حساسه)

طبعاَ نوع البشره يختلف مع مرور الوقت ومع اختلاف المناخ , بالنسبه لي انا بشرتي عاديه الى جافه 

وفي الشتاء او الاماكن البارده تقلب دهنيه ,

وتتغير البشره بتغير تركيب الجسم , اذا قلت السوائل بالجسم تجف البشره 

واذا زادت نسبة الدهون تزيد البشره افراز الدهون والبعض تطلع لهم حبوب 

اخوي من النوع اذا كثر مقالي بشرته تقلب حبوب , واختي اذا كثرت سكريات تقلب حبوب 

فأهتمامك بغذائك يأثر بشكل كبير على بشرتك وشعرك وجسمك فأحرصي واهتمي بنفسك واهتمامك بالعادات الصحيه 

مثل نوم الجمال يأثر بشكل كبير على البشره وممارسة النشاطات الرياضيه وتفأدياَ للاسئله 

نوم الجمال عباره عن النوم مبكر وتقعدين الصباح مبكر 

وتقريباَ وقته من الساعه 8 مساءَ الى 5 صباحاَ

ونجي الحين لطريقة العنايه بالبشره :

بتكلم بشكل مبسط عن طرق العنايه

نبدا اولاَ بالبشره العاديه:

اصحاب البشره العاديه دائماَ تحصلين بشراتهم فيها نظاره وصحه ولامعه مافيها مشاكل 

والسبب طبعاَ يرجع لغذائهم السليم .

طبعاَ طريقة العنايه في هذا النوع من البشره مومتعب نهائياَ

تحتاج عنايه يوميه. 

البشره الحساسه : بالنسبه لي بشره متعبه جداَ خصوصاَ لو كان صاحبها كسول م راح يتحمل دلعها كثر 

لازم قبل ماتحطين اي منتج على البشره تتاكدين انه مايحسس بشرتك ولايهيجها اما تجرين اختبار على جزء بسيط من البشره 

تحتاج عنايه دقيقه , لان اي منتج ممكن يسبب احمرار او حساسيه او حكه وغيره.

البشره الجافه : دائماَ تتقشر تحتاج ترطيب مستمر بكريم ترطيبه فعال , هالبشره لازم ينتبهون اصحابها لان علامات تقدم العمر 

توضح عليها بسرعه وتبان التصدعات الي بالبشره فلازم اسبوعياَ تقشيرها وازالة القشور من على سطحها ترطيبها بكريم يناسب جفافه.

الدهنيه : من البشرات المتعبه جداَ , تفرز الدهون بشكل مستمر تتكون الروؤس السوداء عليها بسرعه , تحتوي على مسامات 

اختيارك لمستحضرات العنايه بها يكون دقيق بحيث تختارين منتجات تتحكم بافرازات الدهون ومنتجات تعمل على تنظيف المسامات واغلاقها 

 .طبعاَ الحسنه الوحيده بهذا النوع ان علامات تقدم السن ماتوضح الا بوقت متأخر شوي 

المختلطه :

مناطق الدهون فيها تحتوي على مسامات ورؤس سودا 

العنايه بهذي الاماكن مثل العنايه بالبشره الدهنيه .

وبكذا خلص الموضوع ويارب اكون افدتكم لو بشي القليل الموضوع القادم بأذن الله راح يكون عن اساسيات العنايه بالبشره 

والعنايه بالبشره وفق الفئات العمريه .

الميزانيه والعنايه ,

 سلام بنات , شخباركم ؟
اول تدوينه لي الحمدلله , ان شاء الله  افيدكم ,
الموضوع بيفيد كثير ان شاء الله والسبب كثير من البنات يكتبون لي في سناب وانستقرام يبغون اتكلم عن هالموضوع
ماحبيت اتكلم فيه الا وعندي خلفيه فيه ,

من المعروف جداّ ان منتجات العنايه باهضة الثمن , وكثثير من البنات وانا كنت وحده منهم , تضغط على نفسها وعلى ميزانيتها
عشان تشتري كل المنتجات الي تحتاجها والي ماتحتاجها خلال فتره زمنيه قصيره , وهذا الشي جدا متعب سواء لك او لشخص الي يصرف عليك ,

وبالنهايه نص المنتجات ماتناسبها وحزات بعض المنتجات ماتناسبها بس عشان اعلان للمنتج الفلاني كان روعه ويجذب الشخص انه يأخذه , والبعض مثلي انا فيني حب تجميع الاشياء حتى لو مااحتاجها بس اهم شي تكون عندي , واحيانا يكون المدح قوي عالمنتج
يخليني غصب اشتريه , وبالنهايه ابتلش فيه وبقوه ,

في 2015 قررت قرار اني مااشتري اي شي الا اقراء عنه البعض كان يرا اني معقده واتفلسلف , بعدها بفتره قصيره
صار يسوي نفس الي اسويه , ويقولون الحمدلله تأثرنا فيك بهالصفه صرنا نحكم ميزانيتنا ونعرف نوازن بين العنايه وغيره .
لانه صراحه شي متعب جدا اذا بتشترين كل المنتجات بنفس الوقت ,وعشان تتفادين الاخطاء ,

خصصي نوت واكتبي بداية كل شهر شنو بتحتاجين هذا الشهر وبداية الورقه اكتبي ميزانيتج وقسميها على احتياجاتك لهذا الشهر
يعني بتشترين مكملات للاشيا الي عند ك مو معقوله بتشترين كل شي من جد وجديد . الا اذا كنتي من النوع الي تلعبين بالكريمات والشامبو وغيره , وكل شهر ورقة جديد وميزانيه جديده , وبتشوفين نهاية السنه الانجاز الي انتي تسوينه شهريا , وكيف الميزانيه تقل وكيف تزيد , وتقيمين المنتجات الي شريتيها,

يعني مثلا هذا الشهر ميزانيتج فيه ٥٠٠ ريال . وانتي شنو بتحتاجين (شي ناقص عندج وتحتاجينه )
١- كريم للجسم
2- سكراب للجسم
3- مزيل مكياج
4- قطن
وزعت ال500 عليهم يمكن بيكلفوني 200 باقيلي من ال500 بس 300
وبكذا فلوسي راح تبقى لي , وارتاح
والشهر الي بعده ميزانيه جديده واحتياجات جديده مثلا خلص القطن الي شريته الشهر الي راح
وكان جودته سيئه بحط عنده انه موزين واشوف قطن احسن منه ,

مثال هذي المنتجات الي خلصتها من  شهر 12 -2017 الى شهر 6-2017
بعض المنتجات حطيت عليها علامه مستحيل افكر اجربها مرا الثانيه وفيه منتجات مااقدر استغني عنها

وفيه منتجات احتاجها اكثر في روتين العنايه الشتوي وفيه الصيفي .
وبالنسبه لي شخصيا المنتجات تطول عندي الحمدلله لاني اقتصد في استخدامها اشوف كثير بنات لما تجي تمسح ويها بتونر مثلا
عادي جدا تستخدم 4 حبات قطن , وويها يحمر واقولها ليه ؟؟؟ اتقول عشان تفتح بشرتي .والا الي تحط قفشة كريم على ويها
واذا قلتي لها ليه اتقول والله ابغا بشرتي تترطب , بتقولون عني ابالغ , والله ماابالغ هذي نص الهوايل الي صارت قدامي ,
لازم تستخدمين المنتجات صح بالكميات الصح عشان تبقى معاج وتستفيدين منها ,
واخيرا , شكرا لكم عطيتوني من وقتكم ويارب اكون افدتكم  لو بشي قليل .